Oza Sámi Made -mearkka
Ohcamuš sáddejuvvo digitálaččat. Mii ávžžuhat du geavahit buriid govaid, go dat bohtet oidnosii min neahttasiidui jus ohcamuš dohkkehuvvo. Jus dárbbašat veahki ohcamušain, sáhtát váldit minguin oktavuođa.
Sápmelaš dahje fitnodat, man eaiggáda dahje eaiggádit sápmelaččat unnimustá 51 %, sáhttet ohcat Sámi Made -mearkka. Sápmelažžan gávnnahuvvo olmmoš, gii atná iežas sápmelažžan ja gean ruoktogiella lea sámegiella, dahje gean vánhema, áhku dahje ádjá, dahje máttarvánhema ruoktogiella lea leamaš sámegiella.
Sertifiserenmearkka geavaheaddjit galget máksit 250 NOK juohke nuppi jagi liseanssa ovddas. Dát ruhta gokčá goluid sertifiserenmearkka čuovvulanbargui, mearkka geavaheddjiid márkanfievrrideapmái ja boasttogeavaheami čuovvuleapmái. Mearkka geavaheaddjit ožžot 150 gálvoetikeahta, go ohcamuš dohkkehuvvo; etikeahtas lea Sámi Made -mearka ja du persovnnalaš liseansanummir. Dan maŋŋá sáhtát dárbbu mielde tiŋgot mearkkaid. Oaččut maid digitála veahkkeneavvopáhka, man sáhtát geavahit márkanfievrridit iežat fitnodaga. Das leat materiálat, maid sáhtát prentet ja materiálat, maid maid sáhtát geavahit iežat neahttasiidduide dahje gálvvuide. Ieš Sámi Made -mearkka ii oaččo rievdadit. Sáhtát mis jearrat eará materialaid dárbbu mielde.
Sáhtát ohcat mearkka goas beare. Sámiráđđi meannuda ohcamušaid juohke mánu. Geasseluomu ja juovlaluomu oktavuođas sáhttá leat veháš guhkit meannudanáigi. Sámiráđđi sáhttá jearrat dus lassedieđuid dárbbu mielde.
Jus du ohcamuš hilgojuvvo, de dus lea riekti váidit dán mearrádusas. Don fertet váidit čálalaččat 3 vahku siste ja fertet čilget váidagis, mo don oaivvildat ahte ohcamuš lea boastut meannuduvvon ja sáddet dieđuid, mat sáhttet dárbbašuvvot váiddameannudeamis. Sámiráđi váiddaorgána mearrádus lea loahpalaš. Váidagat sáddejuvvojit čujuhussii kultuvra@saamicouncil.net.
Jus du ohcamuš hilgojuvvo danne, go it leat addán midjiide doarvái dieđuid, de sáhtát maŋŋá ohcat ođđasit ja bidjat lasi dieđuid mielde.
Sámi Made -liseansageavaheaddjit sáhttet iežaset goasttádusain diŋgot lasi gálvogilkoriid Sámiráđi bokte. Mađi eambbo leat diŋgojeaddjit, dađi hálbbit šaddá diŋgot mearkkaid.
- Deavdde digitála diŋgonskovi ja muital man ollu háliidat diŋgot mearkkaid
Sámiráđđi diŋgo mearkkaid njeallje geardde jagis:
9.2.2024
26.4.2024
28.8.2024
28.11.2024
Hattit soitet molsašuvvat jus leat olu diŋgojeaddjit. Dás oainnát haddeárvalusa (beaiváduvvon 10.1.2024). Hattit muitalit man ollu lassediŋgojupmi sullii máksá ovtta liseansanummira nammii.
- 500 stk: 1350 NOK +25 % vearut
- 1000 stk: 1610 NOK + 25 % vearut
- 2000 stk: 1930 NOK + 25 % vearut