Oza Sámi Duodji -mearkka
Ohcan sáddejuvvo digitálaččat. Mii ávžžuhat du geavahit buriid govaid, go dat bohtet oidnosii min neahttasiidui jus ohcamuš dohkkehuvvo. Jus dárbbašat veahki ohcamušain, váldde minguin oktavuođa.
Sápmelaččat sáhttet ohcat Sámi Duodji -mearkka. Sápmelaš lea son, gii atná iežas sápmelažžan ja gean ruoktogiella lea sámegiella, dahje gean vánhema, áhku dahje ádjá, dahje máttarvánhema ruoktogiella leamaš sámegiella.
- Buvtta lea giehtaduodji, lea lohpi geavahit mášeniid, muhto ii fabrihkkabuvttadeami dahje 3D-prentema.
- Sámi duojár dahje duojárat leat duddjon.
- Galgá geavahit árbevirolaš ávdnasiid ja vuođđun lea árbevirolaš sámi duodji, árbevirolaš hábmen dahje árbevirolaš atnu. Loga eanet ovdamearkalisttus.
- Go leat sádden neahttaskovi, de galggat sáddet/buktit liseansakantuvrii golbma ođđa, iešguđetlágan duoji, mat čájehit du duodjemáhtu. Duojit galget leat duddjojuvvon maŋimuš 3 jagi áigge.
- Lassin ohcci galgá sáddet dujiid mielde bargočilgehusa, mas muitala mot lea bargan ja duddjon dujiid. Lassin ohcci galgá muitalit gos lea oahppan duddjot ja geat leat su oahpahan. Váldde oktavuođa liseansakantuvrrain soahpan dihte dujiid sáddemis/buktimis.
Sertifiserenmearkka geavaheaddjit galget máksit 250 NOK juohke nuppi jagi liseanssa ovddas. Dát ruhta gokčá goluid sertifiserenmearkka čuovvulanbargui, mearkka geavaheddjiid márkanfievrrideapmái ja boasttogeavaheami čuovvuleami. Mearkka geavaheaddjit ožžot 150 gálvoetikeahta, go ohcamuš dohkkehuvvo; etikeahtas lea Sámi Duodji -mearka ja du persovnnalaš liseansanummir. Dan maŋŋá sáhtát dárbbu mielde tiŋgot mearkkaid lasi. Oaččut maid digitála veahkkeneavvopáhka, man sáhtát geavahit márkanfievrridit iežat fitnodaga. Doppe leat materiálat, maid sáhtát prentet ja materiálat, maid maid sáhtát geavahit iežat neahttasiidduide dahje gálvvuide. Ieš Sámi Duodji -mearkka ii oaččo rievdadit. Sáhtát mis jearrat eará materiálaid dárbbu mielde.
Liseansakantuvrrat meannudit ohcamušaid unnimustá guktii jahkái. Muhtin liseansakantuvrrat meannudit dávjjibut ohcamušaid. Váldde oktavuođa liseansakantuvrrain dahje geahča sin neahttasiidduid, jus háliidat eanet dieđuid Sámi Duodji -mearkka meannudeami birra. Liseansakantuvrrat sáhttet jearrat dus lasi dieđuid dárbbu mielde.
Jus du ohcan hilgojuvvo, de dus lea riekti váidit dán mearrádusas. Don fertet váidit 3 vahku siste ja fertet čilget váidagis, mo don oaivvildat, ahte ohcamuš lea boastut meannuduvvon ja fertet sáddet dieđuid, mat sáhttet dárbbašuvvot váiddameannudeamis. Sámiráđi váiddaorgána mearrádus lea loahpalaš. Váidagat sáddejuvvojit čujuhussii kultuvra@saamicouncil.net.
Liseansakantuvra sáhttá fállat dutnje fágalaš láidesteami dujiid ektui. Don sáhtát ođđasit ohcat maŋŋá, jus du ohcan hilgojuvvui dan dihte, ahte du duojit eai deavdán gáibádusaid. Jus du ohcan hilgojuvvo danne, go it leat addán doarvái dieđuid ohcamušas, de sáhtát ohcat ođđasit ja bidjat lasi dieđuid mielde.