Sámi Duodji
Sámi Duodji -mearkka ulbmil lea muitalit oastái, guđe duojit leat eakti duojit, maid sápmelaš lea duddjon. Go oasttát dujiid, main lea Sámi Duodji -mearka, de dieđát ahte don doarjjut sámi duojáriid ja sámi servodaga.
Makkár dujiide sáhtát geavahit Sámi Duodji -mearkka?
Sámi Duodji -mearkka sáhttá geavahit dujiide, man sápmelaš dahje sápmelaččat leat duddjon ja mat čuvvot árbevirolaš ávnnasgeavaheami, hámi, duodjevugiid ja geavahusa. Sámi Duodji -mearkka ovddas lea ráhkaduvvon ovdamearkalistu, mii čájeha guđe dujiide mearkka sáhttá geavahit, ja makkár gáibádusat dujiide leat. Mášeniid lea lohpi geavahit veahkkin duddjodettiin, muhto buktagat, mat leat ollásit mášeniin buvttaduvvon, eai dohkkehuvvo.
Sámi Duodji -mearkka liseansakantuvrrat (Duodjeinstituhtta, Sámi Duodji ry ja Sámi Duodji Sameslöjdstiftelsen) leat min fágaolbmot ja sii leat hábmen listtu fárrolaga. Sii ođasmahttet listtu searválaga dárbbu mielde.
Gálvomearkka rievdademiid ja digitaliseremiid geažil, fertejit olbmot, geain lea boares Sámi Duodji -mearka ohcat ođđasit, vai ožžot ođđa Sámi Duodji -mearkka. Boares Sámi Duodji -mearkka ii oaččo geavahit jagi 2023 maŋŋá.
Mii lea duodji?
Duodji lea árbevirolaš sámi giehtaduodji ja dáidda. Duodji mearkkaša earret eará sihke hábmema ja duddjoma. Duodji lea davvisámegielat doaba sámi giehtaduodjái, ja julevsámegielas dan gohčodit duodjen ja lullisámegielas dat lea duedtie/vætnoe.
Manne mii dárbbašat sámi gálvomearkkaid?
Sámeservodat deaivida dán áigge olu buktagiid, mat vižžet inspirašuvnna sámi kultuvrras, muhto maid eai leat sápmelaččat ieža ráhkadan. Máŋgasat háliidit oastit eakti sámi duoji, muhto sis ii leat doarvái máhttu earuhit eakti sámi duoji ja buktagiid, mat áddestallet duoji. Sámi gálvomearkkaiguin sápmelaččat ieža muitalit máilbmái, guđe buktagat leat eakti duodji, maid sápmelaččat leat duddjon.
Ovdamunit Sámi Duodji -mearkkain
Sámi Duodji -mearkka ulbmil lea nannet sápmelaččaid gilvofámu máilmmis, veahkkin suddjet duoji ja sámi kultuvrra ja sihkkarastit, ahte mii sápmelaččat ieža beassat stivret, mo mii geavahat iežamet kultuvrra gávppálaččat. Go dus lea Sámi Duodji -mearka, de beasat oidnosii min neahttasiidduid ja sosiála mediaid bokte. Máŋggat sámi fitnodagat leat dávjá unnit ja barget ollu okto. Go dus lea Sámi Duodji -mearka, de dus lea stuorát fierpmádat iežat birra. Mii háliidat fállat maid konferánssaid ja kurssaid liseansageavaheddjiide.
Gii hálddaša ja oamasta Sámi Duodji -mearkka?
Sámiráđđi oamasta Sámi Duodji -mearkka sámi álbmoga bealis. Min ovttasbargoguoimmit leat sámi duodjesearvvit ja duodjeásahusat, geat doibmet liseansakantuvran ja hálddašit ja juolludit Sámi Duodji -mearkka.
Norggas: Duodjeinstituhtta
Suomas: Sámi Duodji ry
Ruoŧas: Sámi Duodji Sameslöjdstiftelsen
Sámiráđđi lea sápmelaččaid oktasaš sorjjasmeahttun kulturpolitihkalaš ja politihkalaš ásahus, mii doaibmá sámiid organisašuvnnaid oktasašbargoorgánan. Vuođđudeami rájes jagis 1956 Sámiráđđi lea aktiivvalaččat bargan sámepolitihkalaš figgamušaiguin.
Oza Sámi Duodji -mearkka
Hálidatgo nannet iežat fitnodaga márkanfámu stuorra márkaniin? Dáppe sáhtát ohcat Sámi Duodji -mearkka, gávnnat árbevirolaš duoji ovdamearkalisttu ja eanet dieđuid mearkkaid ohcaneavttuid birra.
Oza dás
